Dato: 15.12.2023 Svartype: Med merknad Bømlo kommune viser til Strømprisutvalget sin rapport «Balansekunst». Rapporten er ein grundig og god gjennomgang av kraftsystemet og moglege tiltak for å bidra til stabile, føreseielege og konkurransedyktige prisar. Bømlo kommune ønskjer her å gje nokre innspel til rapporten på område som påverkar utviklinga i vår kommune og vår region. Bømlo høyrer til same budområde som alle utanlandskablar. For privatkundar vil den midlertidige straumstøtta dekke godt opp for høge prisar, men for næringslivet spesielt vil dei ofte ha vesentleg høgre straumpris enn næringsliv i andre budområde. Straumkostnaden går rett på botnlinja, og me ser at bedrifter vil kunne miste innovasjonskraft og tape terreng opp mot konkurrentar i andre prisområde. Utvalet løftar fram moglegheita for prisutjamning mellom budområde, og tilhøyrande konsekvensar. Om konsekvensar skriv mellom anna utvalet «En konsekvens vil være at man risikere etableringer av mye nytt næringsliv i områder med knapphet og ikke i områder med overskudd og lav pris. <…> det kan også bety at man må gjøre unødvendig dyre investeringer i høyprisområder når de heller hadde vært bedre samfunnsøkonomi å ha etablert næringsliv og etterspørsel etter strøm i lavprisområder.» Me vil gjerne peike på at det er svært mange faktorar som gjer at ei bedrift vel å etablere seg ein stad, utover dette med kraft. Til dømes kompetanse, omkringliggjande industri, veg, vatn, tilgang til sjø, kaianlegg mv. Me meiner det blir feil å sjå på samfunnsøkonomien for straumutbygging aleine , slik det framstår i utvalet sin rapport. I praksis utgjer dette ei konkurransevriding mellom næringsaktørar innanlands, og me ber om at det vert etablert løysingar for prisutjamning mellom prisområde, også på kort sikt det snarleg vert utforma ein politikk for raskare utbygging av kraftnettet mellom prisområda i Norge, slik at den innanlandske konkurransevridinga vert motverka og at ein større del av flaskehalsinntektene vert brukt til å redusere nettleiga i det prisområde kor flaskehalsinntekta har oppstått. «Midlertidig forskrift for bruk av flaskehalsinntekter» må vidareførast fram til ein har klart å balansere straumprisane mellom prisområde innanlands. Når det gjeld energieffektivisering, er dette eit viktig arbeid for å redusere behovet for kraft på nettet. Lokalt ser me moglegheiter i alt frå gjenbruk av spillvarme, produksjon og lagring av kraft på industriområde med meir. For å lukkast med energieffektivisering, vil det vere behov for tett samarbeid og sterk koordinering mellom næringsaktørar som er lokalisert i nærleiken av kvarandre, både eksisterande og nye. Me ber difor om at det blir etablert målretta verkemiddel som gjer det mogleg å energieffektivisere på ein effektiv måte . Bømlo kommune ber om at innspela våre vert teke omsyn til i arbeidet vidare, slik at det vert føreseielege og rettvise rammevilkår for utvikling i ulike regionar når det kjem til straumprisar, og god tilrettelegging for energieffektive løysingar framover. Energidepartementet Til høringen Til toppen <div class="page-survey" data-page-survey="133" data-page-survey-api="/api/survey/SubmitPageSurveyAnswer" data-text-hidden-title="Tilbakemeldingsskjema" data-text-question="Fant du det du lette etter?"
