Dato: 20.07.2022 Svartype: Med merknad Høyringssvar til høyring om ny pengespelforskrift 1. Innleiing Vi viser til høyringsnotat datert 09.05.22, der det vert bede om høyringssvar til høyring om ny pengespelforskrift. Jussformidlingen er eit landsdekkande gratis rettshjelpstiltak, som vert drive av vidarekomne jusstudentar ved Universitetet i Bergen. Det er til einkvar tid tilsett 22 sakshandsamarar, som jobbar heiltid. Vi tilbyr gratis rettshjelp og juridisk bistand til privatpersonar. Vi arbeider innanfor ulike rettsområde, mellom anna gjeldsrett. Gjelda kan blant anna knytte seg til pengespel. Basert på våre erfaringar vil vi komme med nokre merknader til den føreslegne forskrifta. 2. Generelle merknader Jussformidlingen stiller seg i all hovudsak positive til forslaget til ny forskrift. Vi meiner forslaget dannar eit godt rammeverk for ansvarlege og kontrollerte pengespel. I det fylgjande vil vi knyte nokre særlege merknader til den føreslegne forskrifta si ivaretaking av forbrukarvernet. 3. Vedrørande forslaget om å forskriftsfeste krav om registrert spill – føreslege i § 25 jf. § 4 i forskrifta Jussformidlingen stiller seg positive til å forskriftsfeste krav om registrert spel for pengespel som vert tilbydd av einerettstilbydarar, føreslege som § 25 i ny forskrift, jf. § 4. Registrering av kvart spel opp mot den unike speleprofilen er sentralt for overvakinga av spelemønster. Dette gjev i sin tur eit betre grunnlag for seinare fastsetjing av generelle tapsgrenser, eller individuelle grenser satt av den enkelte spelaren. Som omtala i høyringsbrevet sitt punkt 3.2.2, vil dette vere ei vidareføring av gjeldande krav i spelereglar og konsesjon for einerettstilbydarane, men det vil derimot vere nytt for bingotilbydarane. Kravet om registrert spel er likevel eit heilt sentralt verktøy for å kunne overvaka generelle tendensar i spelemønster, og det er difor tenleg å forskriftsfeste eit generelt krav om registrert spel for kvar enkelt tilbydar av pengespel. 4. Vedrørande forslaget om å forskriftsfeste ulike ansvarlegheitstiltak – føreslege i § 26 Jussformidlingen stiller seg vidare positive til forslaget om å forskriftsfeste grunnleggjande ansvarlegheitstiltak overfor tilbydarane av pengespel, samt å fastsette særskilte ansvarlegheitstiltak overfor einerettstilbydarane sine spel. Som omtala i høyringsnotatet sitt punkt 4.2.1, framgår desse i dag av interne retningslinjer eller spelereglar som til ein viss grad kan endrast av tilbydarane sjølv, eller av konsesjon. Slike tiltak, særleg totale og maksimale tapsgrenser, utgjer viktige tryggingsmekanismar for den enkelte spelaren, og særskilt overfor speleavhengige som oftare vil overstige desse. Dette vil også stille klarare krav overfor tilbydarane, som får eit meir oversiktleg regelverk. Det vil difor vere tenleg at kravet om totale tapsgrenser vert forskriftsfesta, som føreslege i ny forskrift § 26 første ledd. 5. Vedrørande forslaget om å forskriftsfeste krav om adgang til å fastsetje personlege taps- og tidsgrenser og oversikt over eige spelemønster – føreslege i §§ 28 og 29 i forskrifta Vidare stiller Jussformidlingen seg bak forslaget om å forskriftsfeste krav om adgang til å fastsetje personlege taps- og tidsgrenser per dag og månad, og at oppjusteringar av desse får ei utsett iverksetjing, føreslege i ny forskrift § 28. Vidare stiller vi oss bak forslaget om å forskriftsfeste kravet om at einerettstilbydarane tilbyr spelarane verktøy som gjev ei enkel og tilgjengeleg oversikt over eiga speleåtferd og tap. Dette er verktøy som er viktige for den enkelte spelaren, og som kan bidra til å auke bevisstheita kring eiga spelemønster. Vidare er dette verktøy som kan vere eigna til å førebygge speleavhengigheit, og vidare bøte på tapa for dei som er råka av speleavhengigheit. Ei forskriftsfesting av desse krava vil difor vere eit viktig tiltak for å verne om denne gruppa. 6. Vedrørande forslaget om vidareføring av betalingsformidlingsforbodet – føreslege i § 98 i forskrifta Jussformidlingen stiller seg i all hovudsak bak forslaget om å vidareføre betalingsformidlingsforbodet til pengespel utan norsk løyve, som føreslege i ny forskrift § 98. Eit effektivt betalingsformidlingsforbod er sentralt for å verne forbrukarane, og særleg speleavhengige, mot å pådra seg uhandterlege gjeldspostar. Ei vidareføring av forbodet vil difor vere eit viktig tiltak for ivareta omsynet til dei mest sårbare deltakarane i pengespel. Til liks med departementet, legg også vi til grunn at det er Lotteritilsynet som skal ha ansvar for å vurdere om ein aktør tilbyr pengespel utan norsk løyve, og vidare gjere vedtak om å stoppe transaksjonar til vedkommande aktør. Utgangspunktet er difor at finansinstitusjonar pliktar å stoppe transaksjonar med brukarstadskode for pengespel, samt stoppe transaksjonar til tredjepartar som formidlar transaksjonar til og frå pengespel utan norsk løyve, og som Lotteritilsynet har gjeve pålegg om å stoppe. Den nye pengespilloven § 5, som trår i kraft frå og med 01.01.23, oppstiller eit generelt forbod mot å formidle transaksjonar til og frå pengespel utan norsk løyve. Dette oppstiller ei generell plikt til å avverje slik betalingsformidling overfor finansinstitusjonar. Vi erfarer at utanlandske pengespelselskap omgår dagens betalingsformidlingsforbod, ved å nytte nye betalingsformidlarar som også formidlar transaksjonar på vegner av andre aktørar. I slike tilfelle vil ikkje den føreslegne forskriftsføresegna fanga opp problematikken i tilstrekkeleg grad. I tilfelle der finansinstitusjonen er kjent med at transaksjonane går til pengespel utan norsk løyve, eksempelvis gjennom tips frå forbrukaren sjølv, bør det difor forskriftsfestast strengare krav til finansinstitusjonen si aktsemd. I slike tilfelle meiner vi det er grunnlag for å stille krav om at finansinstitusjonen stoppar transaksjonane til vedkommande betalingsformidlar, eksempelvis med tidsavgrensa verknad. Her vil det vere uheldig om finansinstitusjonen ikkje får klare og sjølvstendige aktsemdskrav, slik at transaksjonar som går til pengespel utan norsk løyve vert formidla av finansinstitusjonen, grunna manglande vedtak frå Lotteritilsynet. Dette vil også vere i strid med det generelle betalingsformidlingsforbodet som er oppstilt i ny pengespillov § 5. Ei forskriftsfesting av eit slikt aktsemdskrav vil difor vere i tråd med føremålet bak føresegna, og vi meiner difor at departementet må nedfelle eit slikt aktsemdskrav i den nye pengespelsforskrifta. 7. Oppsummering Jussformidlingen stiller seg positive til den føreslegne forskriftsfestinga av krav til ulike ansvarlegheitstiltak overfor tilbydarane av pengespel, og då særskilt einerettstilbydarane. Vi meiner krav om registrert spel, fastsetting av totale og maksimale tapsgrenser, samt tilgang til å fastsetje individuelle taps- og tidsgrenser og eiga oversikt over spelemønsteret, er viktige tiltak for å ivareta forbrukarvernet og førebygge speleavhengigheit. Vi meiner derimot at det bør nedfellast strengare aktsemdskrav til finansføretaka i høve betalingsformidlingsforbodet. Vi meiner det generelle betalingsformidlingsforbodet i § 5 ny pengespillov strekk seg lenger enn dei føreslegne forskriftskrava til finansføretaka, og dette er noko som skapar uklare og uheldige regelsett. Dei føreslegne forskriftskrava fangar heller ikkje opp dei reelle problemstillingane i tilstrekkeleg grad, og forskrifta må difor supplerast med aktsemdskrav som kan fange opp desse, sjå dette høyringssvaret sitt punkt 6. Sveinung Nes, saksbehandler Jonas Nielsen, Leder Rettspolitisk Utvalg Michelle Danker, Daglig leder Kultur- og likestillingsdepartementet Til høringen Til toppen <div class="page-survey" data-page-survey="133" data-page-survey-api="/api/survey/SubmitPageSurveyAnswer" data-text-hidden-title="Tilbakemeldingsskjema" data-text-question="Fant du det du lette etter?"
