Dato: 04.03.2025 Svartype: Med merknad Høyringsinnspill til forslag til endringar i forskrift om høgare yrkesfagleg utdanning (fagskuleforskriften) - institusjonsakkreditering Vi viser til høyring frå Kunnskapsdepartementet knytt til forslag om endringar i forskrift 11. juli 2019 nr. 1005 om høgare yrkesfagleg utdanning (fagskuleforskrifta). Endringane gjeld institusjonsakkreditering. Høyringsfrist er 6. mars 2025. Telemark fylkeskommune gjev med dette svar på høyringa under føresetnad om tilslutning i Hovudutval for utdanning, folkehelse og tannhelse i møte 10.04.2025. Generelt: Forslaga i høyringa synest å vera fornuftige. Endringane inneber ein tydeleg progresjon og krav om profesjonalisering for fagskular som går frå fagområdeakkrediteringar til å søkja institusjonsakkreditering. Institusjonsakkreditering gir fagskulane større fleksibilitet, men det er også ei fordyrande ordning ved at det flyttast ressursbruk frå NOKUT til fagskulane sjølv. Dette inneber auka kostnader. Det er viktig at moglegheita for ei slik profesjonalisering av fagskular gjennom institusjonsakkreditering ikkje svekkjer økonomien i ei slik grad at utviklinga i fagskulane stoppar opp. Me oppmodar derfor Kunnskapsdepartementet til å vurdera økonomiske insentiv for fagskulane til å søkja institusjonsakkreditering. Det blir hevda at slike økonomiske insentiv er til stades i universitets- og høgskulesektoren. Garanti- eller forsikringsordning for skulepengar: Garanti- og forsikringsordninga sikrar studentar refusjon av innbetalte skulepengar dersom skulen frivillig eller pålagd stansar ei fagutdanning og dette medfører at studentar ikkje får fullført utdanninga etter oppsett plan, jf. Fagskoleforskriften. For private fagskular som har ei høg eigenbetaling frå studentane, kan det bli tale om store beløp som må betalast inn i ei forsikrings- eller garantiordning. Fagskulesektoren har vore i stor vekst dei seinare åra. Det er stor etterspurnad etter kompetanse innan høgare yrkesfagleg utdanning og tilskotspotten frå det offentlege har ikkje halde tritt med etterspurnaden frå fagskulane om økonomisk støtte til studium og utdanningsløp. Dette har resultert i at fleire private fagskular har ein stor del av studiane sine med eigenbetaling frå studentane. For desse skulane vil eit slikt krav vera krevjande og økonomisk inngripande. Eit slikt krav kan medføra at utviklinga av nye studiar og tilbodet av utdanningsløp ved desse fagskulane blir meir avgrensa enn etterspurnaden i arbeidslivet tilseier. Dette er uheldig i ei tid med stort fokus på livslang læring og eit stort og udekt kompetansebehov i arbeidslivet. Det å sikra studentane mot økonomisk tap er viktig, men samtidig bør det vurderast moglegheit for forsikringsordningar som inneber at fagskular med studentbetaling ikkje blir ramma unødig hardt. Kunnskapsdepartementet Til høringen Til toppen <div class="page-survey" data-page-survey="133" data-page-survey-api="/api/survey/SubmitPageSurveyAnswer" data-text-hidden-title="Tilbakemeldingsskjema" data-text-question="Fant du det du lette etter?"
