Høyringsfråsegn frå Dag og Tid Dato: 21.06.2017 Svartype: Med merknad NOU-rapporten «Det norske mediemangfoldet» får godt fram at det trengst omfattande offentleg innsats for å sikra at den samfunnsviktige journalistikken vert halden oppe. Vi har diverre alt fått ei svekking av journalistikken med fleire tematiske blindsoner og mindre av den ressurskrevjande journalistikken som granskar økonomi og politikk, grundig og kritisk. For nisjeaviser som Dag og Tid, med svært låge annonseinntekter, er det viktig å få fram at skal vi kunne halda fram med denne typen journalistikk må produksjonsstøtta vidareførast på minst same nivå som i dag. Denne produksjonsstøtta bidrar til eit viktig mangfald av norske aviser og er ei økonomisk rimeleg ordning for å sikra demokratiet og den fjerde statsmakta. Vi er derimot kritiske til ei ny prosjektorientert tilskotsordning som skal stimulera at fleire nyhendemedier publiserer samfunnsviktig journalistikk. Vi meiner at det må vera opp til redaksjonane sjølve å vurdera kva den sårt tildelte pressestøtta skal gå til. Vi vil i tillegg særleg påpeika at det er uheldig at rapporten ikkje drøftar den viktige rolla media og mediepolitikken har for å styrka det norske språket. For nynorskens del er meir bruk av nynorsk i media heilt avgjerande. Som Medietilsynet i 2014 skreiv i rapporten “Kulturrådets tilskuddsordning for periodiske publikasjoner”, er det “hevet over tvil at nynorskpublikasjoner har særlige utfordringer i markedet, spesielt på riksdekkende nivå”. Det berre éi riksdekkjande avis i Noreg som er utgjeven på nynorsk. Dessutan går berre fem prosent av den direkte pressestøtta i dag til aviser redigerte på nynorsk. Det er ein uheldig situasjon når Stortinget har slått fast at vi har to likestilte språk i Noreg. Vi vonar regjeringa tek omsyn til desse språkpolitiske fakta i utforminga av mediepolitikken. Beste helsing Svein Gjerdåker, ansvarleg redaktør og dagleg leiar, Dag og Tid Sveinung Lindaas, styreleiar i Dag og Tid Kultur- og likestillingsdepartementet Til høringen Til toppen <div class="page-survey" data-page-survey="133" data-page-survey-api="/api/survey/SubmitPageSurveyAnswer" data-text-hidden-title="Tilbakemeldingsskjema" data-text-question="Fant du det du lette etter?"
