Dato: 20.12.2024 Svartype: Med merknad Høyringsuttala gjeld pkt. 3.6 Kommunen si rolle i IBU-midlane. Landbruksnæringa har ein sentral plass i våre to kommunar. I Nome og Midt-Telemark har vi vel 1600 landbrukseigedommar, og 336 aktiv landbruksforetak som søkte produksjonstillegg i 2024, 108 i Nome og 228 i Midt-Telemark. Nome og Midt-Telemark landbrukskontor er ein del av næringsapparatet til kommunane, og næringsarbeidet er prioritert oppgåve for landbrukskontoret. Dette omfattar m.a. rådgjeving og rettleing i samband med bruksutbygging og søknader til Innovasjon Norge. Vi kjenner oss ikkje igjen når departementet i si vurdering seier at « i noen kommuner kan det også gå lang tid mellom hver gang en søknad om IBU-tilskudd behandles, og i enkelte tilfeller har saksgangen i kommunen f.eks. ved bytte av saksbehandler, medført en unødvendig lang saksgang ». Vi har mange søknader, stabil arbeidskraft og prioriterer arbeid med saker som gjeld bruksutbygging og inveseringar, og søknader som skal til Innovasjon Norge. Kommunen v/landbrukskontoret sit med god oversikt og lokalkunnskap om landbruksnæringa i kommunen, som Innovasjon Norge neppe vil kunne opparbeide seg. Når kommunen si rolle som førstelinjeteneste no er foreslått avvikla, og sentralisert til Innovasjon Norge, vurderast dette som svært uheldig. Nome og Midt-Telemark landbrukskontor meiner at kommunen har ei viktig rolle i høve til utviklingsarbeid i høve til landbruket i samarbeid med landbruksnæringa. IBU-midlane er svært viktige i så måte. Dersom kommunen si rolle i forvalting av IBU-midlane vert avvikla, kan det føre til at oversikten og fokuset på næringsarbeidet vert svekka, sidan dette ikkje lenger vil vera ei lovpålagt oppgåve. Kommunane si rolle i forvaltning av IBU-midlane er definert i forskriften § 4 og § 6. Kommuane har i dag ei rolle som førstelinjeteneste i samband med søknader, før dei går til Innovasjon Norge for behandling. Vi kjenner oss heller ikkje igjen når dep. skriv at « I forkant av den formelle søknadsprosessen er det ofte en omfattende korrespondanse mellom søker og Innovasjon Norge for å bidra til at prosjektet det søkes om tilskudd for kan oppfylle kriteriene for ordningen og være et økonomisk bærekraftig investeringstiltak ». I våre kommunar er det normal praksis at det er landbrukskontoret som har denne rolla, og at IN først tar del i prosessen når søknad er sendt inn. D en nye søknadsportalen til Innovasjon Norge, som legg opp til at kommunen berre skal gje uttale via eit enkelt avkryssingsskjema, gir liten meining. Vi meiner at kommunen si rolle som førstelinjeteneste bør styrkast, og koma tydeleg fram i søknadsportalen til Innovasjon Norge. Landbrukskontoret har kort veg ut til bonden, og bonden har kort veg og låg terskel inn til landbrukskontoret. Erfaringsmessig har Innovasjon Norge i mindre grad høve til å dra ut på synfaring på garden, og ha direkte dialog med søkjaren. Vi har i alle år vore tett på det som skjer i landbruksnæringa i våre kommunar, båe i høve til lokale organisasjonar og den enkelte gard. Det vil vera uheldig om rådgjeving i høve til IBU-midlar og næringsutvikling i landbruket vert sentralisert. Vi ser på Innovasjon Norge som ein viktig ressurs vi kan dra nytte av i dette arbeidet, men meiner kommunen fortsatt bør ha rolla som førstelinjeteneste. Dei siste åra har fleire oppgåver blitt flytta frå regionalt nivå ut til kommunane, men i dette forslaget til forskriftsendring går ein motsatt veg. Forslaget legg opp til å sentralisere ei oppgåve, som vi meiner er svært viktig at ligg på loalt nivå, og er ei oppgåve som heller bør styrkast på lokalt nivå. Departementet understrekar i si vurdering at det framleis er viktig at Innovasjon Norge og kommunane har god dialog på næringsutviklingsområdet, for eksempel gjennom felles synfaringar i samband med landbruksbaserte næringsutviklingsprosjekt. Vi meiner at denne dialogen, best kan sikrast ved at kommunane fortsatt har ei formell rolle som førstelinjeteneste, og at denne rolla fortsatt kjem tydeleg fram i forskrifta. Landbruks- og matdepartementet Til høringen Til toppen
